Ընթացիկ Նորություններ

ՁԻՀ-ի «Ալիք» երիտասարդական նախաձեռնություն

«Ալիք»-ը «Ձեռնարկությունների ինկուբատոր» հիմնադրամի երիտասարդական նախաձեռնությունն է, որը նպատակ ունի ձևավորել որոշումներ կայացնող, փոփոխություններ կերտող գիտակից սերունդ, որն ապրում և արարում է իր երազած Հայաստանում։ 

Նախաձեռնության նպատակն է բացահայտել ՀՀ բոլոր մարզերից և Երևանից 12-ից 29 տարեկան երիտասարդների ներուժն ու հետաքրքրությունները և ստեղծել միջավայրեր (ակումբների, վիրտուալ քննարկումների և ինտերակտիվ հանդիպումների ձևաչափերով)` ինքնակազմակերպման և ինքնարտահայտման համար։ 

Նախաձեռնությունը երիտասարդներին առաջարկում է միանալ հմտությունների ու կարողությունների զարգացմանն ուղղված ամենատարբեր ոլորտներն ընդգրկող ակումբների, ձեռք բերել նոր ծանոթություններ՝ ՀՀ տարբեր մարզերից, ստանալ կամավորության փորձ, առաջնորդել և կիսվել իրենց լավագույն փորձառությամբ։

Միանալով և սկսելով այս անհավանական ճամփորդությունը՝ «Ալիք»-ի մասնակիցները կանցնեն իրենց անձնական զարգացման ճանապարհը, որը նախատեսում է հմտությունների ու գիտելիքների զարգացմանն ուղղված սովորելու, իրագործելու, կիսվելու և առաջնորդելու փուլեր։ 

Այդ ամենին զուգահեռ, երիտասարդները՝ լինելով կրողն այն կարևորագույն արժեքների, ինչպիսիք են ազնվությունը և արդարությունը, քաջությունն ու նախաձեռնողականությունը, համառությունը, պատասխանատվությունը և հոգատարությունը, իրենց համայնքներում կտարածեն այս արժեքները՝ ձևավորելով ակումբներ և իրականացնելով միջոցառումներ, որոնք անմիջականորեն առնչվում են իրենց հետաքրքրությունների շրջանակին։ Դրանք կարող են ընդգրկել բազմապիսի ոլորտներ՝ տեխնոլոգիաներ, մշակույթ, սպորտ, արվեստ, գիտություն և այլն։ 

«Ալիք» երիտասարդական նախաձեռնությունն իրագործվում է «Ձեռնարկությունների ինկուբատոր» հիմնադրամի համակարգմամբ իրականացվող «Հայաստանում աշխատուժի զարգացման» ծրագրի աջակցությամբ։